I samband med at regjeringa i dag legg fram si nye «Plan for Norge», oppmodar Fjordvegen Rv13 statsministeren og regjeringa om å løfte rassikring og utbetring av eksisterande riks- og fylkesvegar langt høgare i nasjonale prioriteringar — framfor nye, kostbare motorvegprosjekt. Trygg ferdsel, samfunnstryggleik og beredskap må kome før fartsauke og firefelts-utbyggingar.
Rv13 er indre nord–sør-korridor på Vestlandet og knyter lokalsamfunn, arbeidsmarknader, havner, industri og reiseliv saman. Når vegen vert stengt for ras og skred, får helse- og beredskapstenester, skuleelevar, pendlarar, tungtransport og turistnæringa direkte konsekvensar. Ein trygg, heilårsopen veg med forutsigbar framkome er difor både samfunnstryggleik, verdiskaping og kvardagsliv.
– «Plan for Norge» må gi ei tydeleg retning: færre stengingar, færre farlege punkt og meir forutsigbar kvardag for folk og næringsliv. Rv13 er livsnerven i mange lokalsamfunn på Vestlandet. Me ber om ein heilskapleg plan for heile strekninga Stavanger–Sogndal, uavhengig om vegeigar er Statens vegvesen eller Nye Veier, og ei klar, tidfesta opptrapping i midlar til rassikring og standardheving, seier Hans Inge Myrvold, dagleg leiar i Fjordvegen Rv13.
– Ras og stengingar riv ned beredskap, forstyrrar næringstransport og skapar utryggleik for innbyggjarar. Me forventar at regjeringa følgjer opp NTP-løfta om vedlikehald og fornying, og gjer desse prioriteringane reelle i budsjett og gjennomføringsplanar, seier Marta S. Vange, styreleiar i Fjordvegen Rv13.
Fakta frå Rv13 – framsteg og gapet som står att
- Fleire akutte skredpunkt er kartlagde på Rv13. Tidlegare gjennomgangar har peika på rundt 30 identifiserte skredpunkt (om lag 20 med middels og høg fare) på særleg utsette delstrekningar i nord, og om lag 34 skredpunkt når ein ser heile Rv13 samla.
- Positive steg:
- På Lovraeidet–Rødsliane (Suldal) er kontrakt signert for ny 3 km rassikringstunnel – byggestart vinteren 2025 og mål om opning mot slutten av 2029.
- I Ullensvang (Odda–Tyssedal) er rassikring og utbetring mellom Djupevik–Kviturtunnelen i gang – med mål om ferdigstilling hausten 2026.
- Trass i dette vart Odda isolert fleire gonger sist år på grunn av uvêr og ras – eit bilete på kor sårbar kritisk infrastruktur framleis er.
- Behovet nasjonalt er stort: Det er kartlagt om lag 96 mrd. kr i behov for skredsikring på riks- og fylkesvegnett (ca. 35 mrd. riksveg, 61 mrd. fylkesveg). Dagens løyvingar ligg klart under nivået som trengst for å redusere risikoen i tråd med klima- og beredskapsutfordringane.
