Handlingsplan 2026–2028

FJORDVEGEN RIKSVEG 13 SITT FØREMÅL (frå vedtektene):

• Å arbeida for oppgradering og vedlikehald av riksveg 13 slik at denne blir ein trygg veg med gjennomgåande høg standard for heile strekninga.

• Å marknadsføra vegstrekninga som ei effektiv og vakker transportåre og som den indre stamvegen mellom Stavanger og Sogndal.

HANDLINGSPLANEN baserer seg på fylgjande hovudmål for 3-årsperioden:

• Fjordvegen Riksveg 13 skal bli den viktigaste reiskapen for regionar, kommunar og verksemder til å skaffa midlar til rassikring, fullverdig vegstandard utan standardbrot og med gul stripe på Rv 13.

• Fjordvegen Riksveg 13 skal målretta bidra til utvikling av reiselivet i Fjordveg-regionen, for auka konkurransekraft basert på lokale opplevingar.

1. PROFILERING

Fjordvegen Riksveg 13 sitt profileringsarbeid er delt inn i fylgjande områder:

Medlemspleie

Informasjonskanalar

1.1 Medlemspleie

i) Selskapet har som mål å ha direkte kontakt med alle kommunestyra og alle næringsforeiningar minst ein gong pr valperiode. Dette for å orientera og inspirera til aktivt arbeid for Fjordveg-regionen, og å bruka Fjordvegen Riksveg 13 som samarbeidsorgan for sine veginitiativ.

ii) NYTT TILTAK: Gjennomføre to årlege medlemsmøter i Rv-13 kommunar.

iii) NYTT TILTAK: Etablere ei fast ordning der nye ordførarar/næringsaktørar får introduksjonspakke om foreininga sine verkemiddel og prioriteringar.

1.2 Informasjonskanalar

i) Nettside – Vidareutvikla nettsida www.fjordvegen.no, som no framtår i ny drakt og profil.

ii) Sosiale medier – skapa merksemd og vera opne arena for ytringar og dialog og nærare kontakt med befolkninga i Fjordvegregionen

iii) Nyheitsbrev Utsending av nyheitsbrev minimum annakvar månad, med relevant informasjon og nyhende.

iv) Media: Informasjon i samband med konferansar, viktige møte, tema i tråd med føremålet og uttalar.

v) NYTT TILTAK: Lage mediebank med grafikk, kart og fakta som kommunane kan bruke i eigne saker.

vi) NYTT TILTAK: Ta initativ til ein større vegkonferanse på Vestlandet i samarbeid med andre organisasjonar som arbeider med aktuelle vegstrekningar som t.d Haukelivegen E-134 og Hordalandsdiagonalen.

2. PÅVERKNAD

Fjordvegen Riksveg 13 sitt påverknadsarbeid er delt inn i fylgjande områder:

Nasjonal og fylkeskommunal påverknad

Lokal og interkommunal

Betre kunnskapsgrunnlag for politisk påverknad

2.1 Nasjonal og fylkeskommunal påverknad

i) Påverknad og samarbeid med sentrale styresmakter. Øva trykk på kontinuerleg utvikling av tiltak langs Rv 13. Gjennomslag hos løyvande myndigheiter er avhengig av god og spissa informasjon, truverdige nettverk og pågåande og kontinuerleg arbeid frå styret og administrasjon i eit samspel.

ii) Samarbeid med utførande aktørar med ansvar for riksveg 13, Statens vegvesen og Nye Veier AS. Systematisk kontakt, fagleg oppdatering og nettverksbygging.

2.2 Lokal og interkommunal påverknad

i) Støtta kommunar og regionar i deira aktuelle vegtiltak langs Rv 13 og øva påverknad i samarbeid med dei. Utvikle kontaktnett på relevante nivå.

ii) NYTT TILTAK: Tilby regionråda ein årleg temadag om Rv13, med fagpersonar og reiseliv.

iii) Fylkeskommunane som aktive medlemmer og strategiske alliansar.

iv) Støtta næringsmedlemmer og reiselivsmedlemmer i arbeidet deira. Prioritere å utvikla og bruka strategisk nettverk i grensesnittet samferdsel – næringsliv. Vegbasert heilårsreiseliv, reiseruteutvikling og satsinga på Nasjonale turistvegar skal ha spesielt fokus.

v) NYTT TILTAK: Etablere Reiselivsforum Rv13 saman med Visit-organisasjonane for å jobbe om sesongutfordringar, kapasitet og regularitet.

2.3 Betre kunnskapsgrunnlag for politisk påverknad

i) Fremja faglege utgreiingar o.a. som gir betre argument-base og merksemd rundt rassikring og utbetringsarbeid generelt og riksveg 13 spesielt.

ii) NYTT TILTAK: Bestille ei samfunnsøkonomisk analysevurdering av og for Rv13 som heilskap (inkl. ringverknader for reiseliv).

iii) NYTT TILTAK: Lage faktaportal med oppdaterte kart, kostnadsoverslag og prioriteringslister.

3. MEDLEMSSKAP

Fjordvegen Riksveg 13 sitt medlemsarbeid er delt inn i fylgjande områder:

Rekruttering

Medlemsverdi

Involvering

3.1 Rekruttering

i) NYTT TILTAK: Eige vervingsprogram mot bedrifter langs strategisk viktige delstrekningar.

ii) NYTT TILTAK: Tilby nye medlemmar synlegheitspakke: presentasjon i nyheitsbrev, innlegg i sosiale medium og lenking på nettsida.

3.2 Medlemsverdi

i) NYTT TILTAK: Utvikle medlemsportal med ressursar, malar og kart.

ii) NYTT TILTAK: Utarbeide ein årsrapport som viser kva foreininga har gjort gjennom siste årsbeidsår.

iii) NYTT TILTAK: 1-2 medlemsbesøk langs vegen kvart år – i samband med medlemsmøter. Jfr. (1) Profilering.

3.3 Involvering

i) NYTT TILTAK: Innhente medlemstilbakemeldingar gjennom årleg spørjeundersøking.