§1 Foreininga sitt namn. 

Foreininga sitt namn er Foreininga for Fjordvegen Riksveg 13. 

§2 Foreininga sitt forretningskontor.

Foreininga sitt forretningskontor er i Ullensvang kommune. 

§3 Foreininga sitt føremål.

Foreininga sitt føremål er:

1. Å arbeida for oppgradering og vedlikehald av Rv 13 slik at denne blir ein trygg veg med gjennomgåande høg standard for heile strekninga.
2. Å marknadsføra vegstrekninga som ei effektiv, vakker transportåre og som den indre stamvegen mellom Stavanger og Sogndal.

§4 Organisasjonsform

Foreininga er ein frittståande juridisk person med medlemmer, og er sjølveigande. At den er sjølveigande medfører at ingen, verken medlemmer eller andre, har krav på foreininga si formue eller eigedelar, eller er ansvarleg for gjeld eller andre forpliktingar.

§5 Medlemmer

Medlemmer i foreininga er fylkeskommunar, kommunar, interkommunale selskap, vegselskap, næringsorganisasjonar, verksemder og andre føretak som har interesse i foreininga sitt føremål.

§6 Rettar og plikter knytta til medlemskapet

Alle medlemmer har rett til å delta på årsmøte, har stemmerett og er valgbare til tillitsverv i foreininga. Medlemmer som skylder kontingent for meir enn eitt år, har ikkje stemmerett eller andre rettar, og styret kan stryka dei som medlem av foreininga. Medlemmene pliktar å forhalda seg til vedtak som er fatta av årsmøte.

§7 Årsmøtet

Foreininga Fjordvegen Riksveg 13 sitt øvste organ er årsmøtet som skal avhaldast innan utgangen av juni kvart år. Årsmøtet skal kallast inn med minst 4 vekers varsel, og skal handsama følgjande saker:

• Val av møteleiar
• Årsmelding og rekneskap
• Val av 5 av 7 styremedlemer for 2 år om gongen. Valet vert organisert slik at det høvesvis er 2 og 3 på val annakvart år. Val av 3 varamedlemer i nummerrekkefølge for 1 år om gongen.
• Val av leiar og nestleiar for 1 år om gongen.
• Fastsetja kontingent for påfølgjande år.
• Vedta treårig handlingsplan og langtidsbudsjett med rullering for kvart år.
• Vedta eventuelle vedtektsendringar, jfr. §11.
• Val av valnemnd.
• Andre saker som er innsende av medlemmer innan 2 veker før årsmøtet og handsama av styret.

Valnemnda si innstilling skal sendast ut seinast 2 veker før årsmøtet.

Fylkestinga i Rogaland og Vestland oppnemner sjølv kvart sitt styremedlem med personleg varamedlem for 4 år om gongen som følgjer valperioden for val til fylkesting.

Alle vedtak på årsmøtet vert avgjort med vanleg fleirtal, dersom desse vedtektene ikkje seier noko anna. Alle røyster tel likt som vert gitt ved frammøte eller ved fullmakt.

Røyster i årsmøtet tel i samsvar med tabellen under:

Medlemskategori 1: Kommunar: 5 røyster
Medlemskategori 2: Næringsselskap/Interesseselskap over 50 medlemmer: 3 røyster
Medlemskategori 3: Næringsselskap/Interesseselskap inntil 50 medlemmer: 2 røyster
Medlemskategori 4: Bedrifter/Andre med over 100 tilsette: 3 røyster
Medlemskategori 5: Bedrifter/Andre med under 100 tilsette: 2 røyster
Medlemskategori 6: Bedrifter med inntil 5 tilsette: 1 røyst
Medlemskategori 7: Vestland fylkeskommune: 10 røyster
Medlemskategori 8: Rogaland fylkeskommune: 10 røyster

Alle saker vert avgjort ved vanleg fleirtal. Ved stemmelikskap avgjer møteleiar si dobbelrøyst.

§8 Styret

Foreininga sitt styre skal ha 7 medlemer med varamedlemer vald slik det går fram av paragraf 5 i desse vedtektene.

Styret har ansvar for den daglege drifta av foreininga, som m.a. inneber:

• Gjennomføra dei planar som årsmøtet fastset
• Syta for at foreininga vert organisert med dagleg leiing og sekretariat
• Fastsetja detaljert årsbudsjett
• Gje uttalar på vegne av organisasjonen
• Førebu og handsama alle saker som skal leggjast fram for årsmøtet
• Kalla inn til ekstraordinært årsmøte når styret finn det nødvendig, eller dersom 1/3 av medlemmene krev det.
• Andre saker som føl av styret sitt ansvar.

Styret er vedtaksført når 4 eller fleire medlemmer er tilstades. Styret vert kalla saman til møte når styreleiar finn det naudsynt eller når minst 3 av styremedlemmene krev det. Alle saker vert avgjort ved vanleg fleirtal. Ved stemmelikskap avgjer møteleiar si dobbelrøyst.

§9 Forvaltning av foreininga

Styret representerer foreininga eksternt. Styreleiar teiknar for foreininga. Foreininga kan ikkje ta opp lån.

§10 Kontingent

Vert betalt forskotsvis for 1 år om gongen. Utmelding av foreininga med bindande verknad for kontingentbetaling må vera gjort minst 1 år før det kalenderåret utmeldinga skal tre i kraft.

§11 Vedtektsendring

Vedtektsendring på årsmøtet krev 2/3 fleirtal av gjevne røyster enten frå den som er til stades på årsmøtet eller ved fullmakt.

§12 Oppløysning

Årsmøtet kan etter lovleg innkalling løysa opp foreininga med ¾ fleirtal, jfr. 1. punktum i denne paragrafen. Årsmøtet avgjer kva eventuelle unytta midlar skal brukast til.

Fjordvegen Riksveg 13 arbeider for trygg og rassikker Riksveg 13 samt for reiseruteutvikling på denne indre hovudferdselsåra gjennom to fylke; Rogaland og Vestland frå Stavanger til Sogndal.

Me har sidan 1995 arbeidd for og oppnådd fleire milepælar i arbeidet for rassikker og trygg, effektiv riksveg for indre vestland. Foreninga Fjordvegen Riksveg 13 er politisk styrd men er partipolitisk nøytral. Styret har med ein representant frå næringslivet.

Fjordvegen Riksveg 13 har som medlemmer; to fylkeskommunar og 11 kommunar frå Stavanger i sør til Sogndal i nord, men og næringsforeningar og mest større private bedrifter. Me ønskjer å auka bedrifts-engasjementet for større styrke og breidde samt å få fram næringslivet sine behov og gode argument i dette viktige arbeidet.

Vår årskonferanse er blitt viktig, med innleiarar og debattantar frå toppolitisk nivå i god blanding med store og små bedrifter og lokalt og regionalt politisk nivå. Konferansen er open for alle og er blitt hovudarena for å løfta og debattera riksveg 13 og indre vestland sine behov for betra samferdsel og samfunnsutvikling. Årskonferansen og årsmøtet 2024 er 4. mars på Flesland.

Foreninga er aktive i høve oppfølginga av vedtatt Nasjonal transportplan samt revisjonen av denne fram til behandlinga våren 2024. Me har elles løpande kontakt med Statens vegvesen og Nye Veier AS m.a. for dei strekka av riksveg 13 som har vedtekne utbyggingsmål i ny NTP. Nasjonal rassikringsgruppe er det og naturleg å ha tett samarbeide med, samt å få fram ny forsking og kunnskap om naturfare og nye tekniske løysingar for rassikring.

Utfordringane knytt til auka klimarisiko og eit våtare og villare klima gjer rassikring enno meir viktig. Hyppig stenging av m.a. Vikafjellet aukar. Det gjeld og auka bruk av preventiv stenging grunna rasfare på andre strekk av rv13 (Ullensvang og Suldal særleg).

Riksveg 13 blei frå 2020 «ny»:

1. I sør er Stavanger nytt endepunkt frå 30. desember 2019 då Ryfylketunnelen mellom Stavanger og Strand opna.
2. I nord blei Rv 13 lagt om og fekk ny trase som riksveg frå ferjeleiet Hella nord for Sognefjorden og austover til Sogndal sentrum.
3. Vestland fylke vart skipa, og Rv 13 har no ein viktig funksjon som samanbindingsveg for indre del av dette storfylket. Det fysiske midtpunktet i Vestland fylke er også oppe på Vikafjellet. 

Medlemsskap

Fjordvegen Riksveg 13 driv ikkje kommersielt, men ønskjer ei breidde av private aktørar med tilknytning til Fjordveg-regionen og med interesse for betra samferdsel på eller tilknytta riksveg 13 velkomne med. Årskontingenten er låg, både for næringsforeningar og bedrifter. Nye vedtekter finn du øvst på denne sida. Røysting på årsmøtet: Jfr § 7.

Kontingent 2024 vedtatt på årsmøtet 25. april 2023

Medlemskategori 1: Kommunar kr 45.000
Medlemskategori 2: Næringsselskap/Interesseselskap over 50 medlemmer kr 5.000
Medlemskategori 3: Næringsselskap/Interesseselskap inntil 50 medlemmer kr 2.500
Medlemskategori 4: Bedrifter/Andre med over 100 tilsette kr 5.000
Medlemskategori 5: Bedrifter/Andre med under 100 tilsette kr 2.500
Medlemskategori 6: Bedrifter med inntil 5 tilsette kr 1.000
Medlemskategori 7: Vestland fylkeskommune kr 200.000
Medlemskategori 8: Rogaland fylkeskommune kr 120.000

Kategoriane for private aktørar er ikkje endra på fleire år. Det kjem ikkje mva på desse beløpa. Vedtektene var reviderte på Årsmøtet 2024.

Kva får ein igjen?

• Prioritering i Fjordvegen Riksveg 13 sitt arbeid, invitasjonar til tematiske møte.
• Medlemsskrivet Fjordveg-drøsen blir tilsendt på e-post 3-5 ganger i året.
• Medlemspris for Årskonferansen og prioritet for innlegg her og på andre møte.
• Presentasjon på fjordvegen.no (t.d. i artiklar) om ein vil. Me deler gjerne medlemma sine innlegg på Facebook-profilen om det har tilknytning til samferdsel og næringsutvikling, og i publikasjonane til Fjordvegen Riksveg 13.
• Prioritering i offentlege presentasjonar og ved pressekontakt.
• Fjordvegen Riksveg 13 ønskjer å bli invitert og deltek på lokale møte som medlemma skipar til.
• Invitasjon på møte, m.a. på styret sin møterunde i Fjordveg-regionen kvart 4. år.

På fjordvegen.no finst informasjon om arbeidet, styret med portokollar og uttalar, vedtekter, kven som er medlemmer, vilkår og ikkje minst om vårt løpande arbeide i høve Nasjonal transportplan og andre prioriteringsprosessar. På facebook og instagram finst nytt frå samferdsel knytt til riksveg 13, fagmiljø innan samferdsel, medlemsaktivitet, og reiseliv i Fjordveg-regionen.

Me håper informasjonen er tilstrekkeleg for å verta medlem. Innmeldingsskjema finn du på medlemsida. Ta kontakt med våre styremedlemmer eller administrasjonen for spørsmål.